काठमाडौंः बंगालको खाडीमा विकसित भएको ‘दाना’ नाम दिइएको चक्रवातको प्रत्यक्ष असर नेपालमा नपरे पनि आंशिक प्रभावले कोशी प्रदेशमा वर्षा हुने मौसमविद्ले जनाएका छन् ।
सो शक्तिशाली चक्रवात बिहीबार राति भारतको ओडिशा राज्यको जमिनमा बज्रिएको छ । ओडिशा र पश्चिम बंगालमा मेघगर्जन र चट्याङसहित भारीदेखि अति भारी वर्षा गराउने भन्दै पूर्वसतर्कता अपनाइएको छ । प्रभावित क्षेत्रबाट हजारौं मानिसलाई सुरक्षित स्थानमा सारिएको छ भने उद्धार टोलीलाई उच्च सतर्कताका साथ राखिएको छ । हवाई र रेल सेवा स्थगित गरिएको छ भने सबै शिक्षण संस्थाहरु बन्द गरिएको छ ।
सो चक्रवातको सबैभन्दा बाहिरी घेराका हल्का बादलमात्र नेपालसम्म आउने मौसमविदले बताएका छन् । जसका कारण कोशी प्रदेशमा हल्का वर्षाको सम्भावना हुनुका साथै मधेश र बागमती प्रदेशमा हल्का बादल लाग्ने जल तथा मौसम विज्ञान विभागले जनाएको छ ।
बंगालको खाडीमा शक्तिशाली चक्रवात आउने भएपछि भारतमा अपनाइयो उच्च सतर्कता
